Babë e bir janë vënë në pranga nga Policia e Tiranës. Autoritetet bëjnë me dije se të arrestuar janë: Skënder Jonuzi 39 vjeç dhe djali i tij E. Jonuzi 16 vjeç, banues në Tiranë.
Për këta dy persona, policia kishte informacione se ata lëviznin me armë me vete. Teksa babë e bir kanë qenë duke udhëtuar me triçikël në rrugën “Ali Kolonja” në Tiranë, policia ka vendosur që t’i ndalojë dhe t’i kontrollojë.
Gjatë kontrollit të triçiklit u gjetën dhe u sekuestruan 2 armë zjarri automatik dhe municion luftarak.
Ndërkohë në vijim të operacioni të koduar “Parandalimi”, është proceduar penalisht dhe një 68-vjeçare, e cila ruante në banesën e saj armët e zjarrit që iu sekuestruan dy të arrestuarve.
Policia bën me dije se lidhur me këtë operacion vijon puna për dokumentimin e plotë ligjor të kësaj veprimtari kriminale dhe zbulimin e qëllimit që kishin këta persona me armët që posedonin.
Discussion about this post