Një 43-vjeçar me origjinë shqiptare, banues në Rimini të Italisë, është arrestuar nga karabinierët, pasi akuzohet për dhunë në familje, plagosje dhe kërcënime ndaj bashkëshortes dhe djalit të tij 22-vjeçar.
Ngjarja e fundit ka ndodhur më 5 gusht në një hotel, ku shërbimet e policisë u thirrën pas një telefonate të djalit të 43-vjeçarit.
Sipas mediave italiane, burri ishte në gjendje të dehur dhe po kërkonte para nga bashkëshortja, të cilat ajo i kishte fituar nga puna si punëtore shtëpie gjatë muajve qershor dhe korrik.
Situata u përshkallëzua kur 43-vjeçari tentoi të hidhte një biçikletë drejt makinës së një klienti të hotelit dhe më pas goditi djalin në fytyrë. I riu ndërhyri për të mbrojtur nënën e tij dhe arriti ta ndalonte të atin deri në mbërritjen e karabinierëve.
Edhe 22-vjeçari pësoi dëmtime gjatë përleshjes.
Sipas hetimeve, dhuna në familje dyshohet se kishte nisur që në mars të vitit 2020, kur dy fëmijët e çiftit ishin ende të mitur.
Në një prej rasteve të hetuara, 43-vjeçari, në gjendje të dehur, kishte hyrë në dhomën e fëmijëve dhe kishte ushtruar dhunë, ndërsa bashkëshortja ishte përpjekur të mbronte fëmijët.
Sipas autoriteteve italiane, gruaja në atë rast ishte detyruar të mos tregonte të vërtetën në spital për mënyrën se si ishte dëmtuar.
Një tjetër episod është regjistruar më 2 gusht, kur 43-vjeçari dyshohet se ka sulmuar sërish bashkëshorten, duke i shkaktuar dëmtime. Të nesërmen, ajo vendosi të denonconte rastin në polici.
Më 4 gusht, një ditë para arrestimit, burri dyshohet se është shfaqur edhe në vendin e punës së gruas dhe e ka kërcënuar.
Pas hetimeve, prokurori publik ka kërkuar që 43-vjeçari të mbahet në arrest në burg, ndërsa çështja vijon të jetë nën hetim nga autoritetet italiane.
Discussion about this post