Arrestohet 44-vjeçari në Durrës,tentoi të çonte të miturit në Itali

Policia e Durrësit ka arrestuar një 44-vjeçar, i shpallur në kërkim në dhjetor 2022.

Ky person, së bashku me të tjerë, kanë tentuar të çojnë në Itali disa djem të mitur, duke i prezantuar sikur janë pjesë e një ekipi sportiv.

Njoftimi i policisë:

Vijimi i operacionit, nga DVP Durrës, në bashkëpunim me Policinë Kufitare të Morinës. Kapet dhe vihet në pranga një shtetas i shpallur në kërkim në kuadër të këtij operacioni.

Në vijim të operacionit policor të koduar “Ekipi”, të zhvilluar në datën 27.12.2022, nga Seksioni për Hetimin e Trafiqeve të Paligjshme të DVP Durrës dhe strukturat e Policisë Kufitare të Durrësit, bazuar në inteligjencën informative, në bashkëpunim me Policinë Kufitare të Morinës, është kapur në hyrje, në PKK Morinë, dhe është ndaluar shtetasi i shpallur në kërkim:

-M. K., 44 vjeç, banues në Gjakovë, Kosovë.

44-vjeçari ishte shpallur në kërkim, në kuadër të operacionit policor të koduar “Ekipi”, të zhvilluar në datën 27.12.2022, pasi në bashkëpunim me 10 shtetas të tjerë (të arrestuar gjatë këtij operacioni), tentuan të kalonin drejt Italisë, 16 shtetas të mitur (të moshës 17-vjeç), kundrejt fitimit 3000-4000 euro për secilin, duke i prezantuar ata si pjesë e një ekipi sportiv.

Ndaj shtetasit M. K., Gjykata e Rrethit Gjyqësor Durrës ka caktuar masën e sigurisë “Arrest në burg”, për veprat penale “Mashtrimi”, “Falsifikimi i dokumenteve” dhe “Ndihma për kalim të paligjshëm të kufirit”.

Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.