Policia e Lushnjës ka arrestuar një 49-vjeçar pasi ka plagosur me thikë një person tjetër.
Pas marrjes së njoftimit se në spitalin e Lushnjës ka shkuar i plagosur shtetasi Gazmend Dedej, 41 vjeç, menjëherë është ngritur grupi hetimor dhe pas një pune intensive dhe veprimeve të mirëorganizuara u bë e mundur zbardhja e ngjarjes, identifikimi dhe kapja e autorit të dyshuar, shtetasit Agron Dervishi, i cili në lagjen “20 Tetori”, në lokalin e tij, pas një konflikti për motive të dobëta ka goditur me thikë 41-vjeçarin.
Shtetasi Gazmend Dedej, ndodhet në spitalin e Lushnjës nën kujdesin e mjekëve.
Gjatë kontrollit të ushtruar në banesën e shtetasit Agron Dervishi, u gjetën dhe sekuestruan në cilësinë e provës materiale thika me të cilën dyshohet se ka kryer krimin dhe 1 shkop bejsbolli.
Në vijim të veprimeve, specialistët për Hetimin e Krimeve në Komisariatin e Policisë Lushnjë arrestuan për veprat penale “Vrasje me dashje” e mbetur në tentativë dhe “Mbajtja pa leje e armëve të ftohta” shtetasin A. D., 49 vjeç, banues në Lushnjë.
Gjithashtu, u arrestua në flagrancë edhe shtetasi Arjan Tabaku, 55 vjeç, banues në Lushnjë, i cili ka qenë i pranishëm kur ka ndodhur ngjarja dhe nuk ka kallëzuar në organet kompetente krimin e ndodhur.
