Policia e Kukësit ka vënë në pranga një 60-vjeçar, pasi ky i fundit dyshohet se kalonte në mënyrë të paligjshme emigrantë përtej kufirit kundrejt parave. Mësohet se 60-vjeçari , banues në Tiranë, është me iniciale P.T dhe arrestimi i tij nga policia u bë në vendin e quajtur ‘Mbikalimi i Gostilit’, në kuadër të operacionit të koduar “Morina”.
Ai është arrestuar në flagrancë duke transportuar me automjetin tip “Opel”, 4 emigrantë të paligjshëm, për t’i kaluar në mënyrë të paligjshme nëpërmjet kufirit të gjelbër, drejt Kosovës, kundrejt fitimit.
Gjithashtu 60-vjeçarit i janë sekuestruar nga policia në cilësinë e provës materiale automjeti me të cilin po transportonte emigrantët, një aparat celular dhe 200 euro të dyshuara të përfituara nga kjo veprimtari. Materialet hetimore do t’i kalojnë Prokurorisë pranë Gjykatës së Shkallës së Parë Kukës, për veprime të mëtejshme.
Discussion about this post