Arrestohet hajduti serial, u kap duke vjedhur në market (Emri)

Policia në Librazhd ka arrestuar në flagrancë një 33-vjeçar, pasi gjatë natës është kapur duke vjedhur në një market.

Shtetasi Klodian Qoshku kishte mundur të hynte në market duke thyer derën me sende të forta. Kjo nuk është vjedhja e parë e kryer nga ana e tij. Policia numëron një sërë grabitjesh, ndërsa rezulton se është i dënuar edhe më parë për të njëjtën vepër penale.

Nga hetimet rezulton se 33-vjeçari në bashkëpunim me persona të tjerë, ende të pa identifikuar, ka kryer disa vjedhje të tjera në qytet, çka të lë të nënkuptosh se kemi të bëjmë me një hajdut serial.

Vjedhjet e kryera nga 33-vjeçari

-Më datë 24.04.2023, ka vjedhur 2 varëse floriri, në një banesë;

-Më datë 24.03.2023, dyshohet se në bashkëpunim me persona të tjerë ende të paidentifikuar, ka vjedhur një shumë parash, në kasafortën e një servisi;

-Më datë 18.02.2023, ka vjedhur bizhuteri të ndryshme, në një banesë;

-Më datë 04.02.2023, ka vjedhur një shumë parash, në një dyqan.

Nga ana e policisë vijon puna për zbardhjen dhe dokumentimin e vjedhjeve të tjera, që mund të ketë kryer ky person, si dhe për identifikimin e bashkëpunëtorëve të tij.