Fotot tregojnë resortin luksoz ‘Saint Michelle Residence’, në fshatin Shetaj të Ishmit në Durrës, për të cilin është arrestuar sot nga Policia ish-kryeinspektori i IMT-së në Bashki, Ardian Halili. Ky i fundit akuzohet se e ka ndërtuar resortin pa leje gjatë kohës që ishte në detyrë (viti 2017).
Godina, shtëpi, ambiente luksoze me palma dhe pishina, për të cilat po bëhen aktualisht hetime të thelluara, nëpërmjet shqyrtimit edhe të dokumentacioneve në Kadastër.
Kompleksi, i njohur si “Restorant Saint Michelle Camping Hotel”, përmban ambiente luksoze, pishina dhe struktura banimi. Megjithëse fillimisht policia raportoi për ndërtim të disa shtëpive të pushimit pa leje, hetimet e thelluara sugjerojnë se i gjithë kompleksi mund të jetë ndërtuar në paligjshmëri të plotë.
Organet kompetente po hetojnë edhe dokumentacionin pranë Kadastrës për të zbardhur plotësisht çështjen. Ndërkohë, ndaj Halilit priten veprime të mëtejshme ligjore.
Vlen të theksohet se Halili u shkarkua nga posti i drejtorit të Inspektoratit Kombëtar të Mbrojtjes së Territorit në vitin 2021. Edhe për këtë ngjarje ka pasur një konfuzion, pasi ai deklaroi se kontrata i ishte ndërprerë nga Bashkia, ndërsa institucioni lokal bëri me dije se ai kishte dhënë dorëheqjen vetë.
Discussion about this post