Arrestohet për drogë në Turqi stilisti i njohur shqiptar

Stilisti i njohur nga Kosova, Valdrin Sahiti është vënë në pranga nga autoritetet turke pasi është kapur me drogë.

KosovaNews bën me dije se Sahiti është kapur në aeroportin e Stambollit dhe akuzohet për veprën penale ‘blerja, pranimi, posedimi i drogave dhe stimuluesve për përdorim’ bazuar në nenin 191 të kodit penal të Turqisë.

Policia turke e ka njoftuar Policinë e Kosovës se Valdrin Sahiti është kapur me pasaportë diplomatike të lëshuar nga Republika e Kosovës.

Sahiti ka shfrytëzuar statusin e diplomatit për të kaluar në zonën VIP të aeroportit të Stambollit, por pas dyshimeve të policisë turke ai është kontrolluar dhe i është gjetur drogë. Nuk dihet ende sasia e drogës që i është gjetur.

Sahiti u pajis me pasaportë diplomatike në vitin 2020 me rekomandim të ish Ministres së Jashtme të Kosovës, Melisa Haradinaj. Vetë stilisti ka “reaguar” në rrjetet sociale. Në rrjetet sociale ai “shihet” teksa ndodhet në Dubai, por sesa e vërtetë është diçka e tillë, nuk dihet.