Policia ka arrestuar të fortin e Shkodrës Safet Bajri. Arrestimi i tij ka ardhur pas urdhrit të dhënë nga GJKKO, ndërsa Bajri po transferohet në këto momente drejt Tiranës.
Dy ditë më parë forcat RENEA kryen kontrolle në banesën e Safet Bajrit në Shkodër. Sipas avokatëve të Safet Bajrit ky i fundit ishte thirrur në orën 11:00 për të dhënë deklarime, por pas mbërritjes në policinë e Shkodrës, i është komunikuar se marrja në pyetje e tij do bëhet në Tiranë. Mbrojtja nuk konfirmon ti jetë komunikuar ndonjë urdhër arresti, ndërsa pohon se për herë të dytë kërkohet marrja e ADN-së së këtij shtetasi. Bajri është nisur drejt Tiranës i shoqëruar me masa sigurie.. Bajri akuzohet për një vrasje të kryer në vitin 2018. Arrestimi i tij u krye pas një urdhri të lëshuar nga Gjykata e Posaçme Kundër Korrupsionit dhe Krimit të Organizuar (GJKKO).
Gjithashtu, GJKKO ka lëshuar një urdhër arresti edhe për Asmer Bilalin, një nga anëtarët e dyshuar të bandës “Bajri”. Bilali është një emër i njohur për autoritetet, pasi ka qenë i lidhur me aktivitete të ndryshme kriminale në të kaluarën.
Safet Bajri deklaroi më herët se nuk ka lidhje me asgjë, duke përmenduar masakrën e Dobraçit.
Ai theksoi se Asmer Bilalin e kaa shok, duke theksuar se “kurrë në jetë nuk i kam ndërhyrë në probleme dhe as nuk e lejoj të më ndërhyjë në problemet e mia”.,
“Kur vjen policia, i jap USB e kamerave, nuk kam lidhje me asgjë, dhe sulmohet Safeti. Për çfarë? Ka ardh RENEA te banesa ime… në lidhje me masakrën e Dobraçit unë ua kam dhënë kamerat. Unë me atë familje nuk kam pasur kurrë asnjë problem. Asnjëherë në jetë nuk kemi pasur probleme me familjen Lici. Njerëzit kanë shoqëri të ndryshme, kur ta votojë parlamenti dhe të më caktojnë mua se kë të kem shok atëherë unë nuk rri se po shkel ligjin. Konflikti me familjen Lici nuk ekziston, njerëzit mund të kenë inat pse unë kam shok x apo y… Unë Asmer Bilalin e kam shok dhe nuk e mohoj. Kurrë në jetë nuk i kam ndërhyrë në probleme dhe as nuk e lejoj të më ndërhyjë në problemet e mia”, tha Safet Bajri për Top Story.
Gjithashtu reagoi edhe avokati i tij, i cili u shpreh se “Safet Bajrin nuk ka asnjë provë që e lidh me asnjë grup kriminal”.
“Në lidhje me Safet Bajrin nuk ka asnjë provë që e lidh me asnjë grup kriminal. Disa herë i kanë vajtur në shtëpi dhe ka qenë i hapur me hetimin dhe është i gatshëm të përballet me këtë hetim. Sesi lidhen tre ngjarjet kriminale është çështje e prokurorisë”, thekson ai.
Discussion about this post