Një 40-vjeçar shqiptar ka përfunduar në prangat e policisë italiane pasi u kap në flagrancë duke i shitur kokainë një klienti në Nuvolera, provinca e Brescias.
Sipas mediave italiane, shqiptari rezulton me precedentë penalë dhe prej dy vitesh ushtronte aktivitetin kriminal si shpërndarës droge. Ai ra në sy të policisë gjatë një kontrolli rutinë pranë një parkingu në Via Ceselle, kur ndaloi makinën dhe iu afrua një person tjetër përmes dritares.
Oficerët ndërhynë në momentin e shkëmbimit, duke e kapur në flagrancë teksa po i dorëzonte klientit dy doza kokaine. Gjatë kontrollit të mëtejshëm, mes këmbëve të tij u gjetën edhe 14 doza të tjera, të paketuara dhe gati për shitje, si dhe një shumë parash që dyshohet se janë përfituar nga veprimtaria e paligjshme.
Klienti, i shoqëruar më pas nga policia, ka pranuar se furnizohej rregullisht nga shqiptari prej afro dy vitesh.
Pas arrestimit, autoritetet italiane kanë bërë me dije se 40-vjeçari do të dëbohet nga Italia pas përfundimit të procesit gjyqësor.
Hetimet po vijojnë për të zbuluar nëse shqiptari ishte pjesë e një rrjeti më të gjerë trafikantësh në zonën e Brescias.
Discussion about this post