Një muaj pas arrestimit të tre punonjësve të Administratës së Zonave të Mbrojtura Lezhë për tjetërsim të pronave në lagunë, prokuroria e rrethit urdhëroi arrestimin e një kryeplaku po ashtu i dyshuar në tjetërsim pronash.
Gjykata e Lezhës caktoi masë sigurie arresti me burg për kryeplakun e fshatit Grykë Lumi, i ndaluar pas hetimeve të prokurorisë për tjetërsim të pronësisë së Lagunës së Kune Vainit. Policia njoftoi se arrestimi ishte vijim i operacionit “Tjetërsimi i Lagunës”, i zhvilluar rreth 1 muaj më parë kur u arrestuan 3 zyrtar të Administratës së Zonave të Mbrojtura dhe u shpall në kërkim një i katërt.
Policia njoftoi se si rezultat i hetimeve është arrestuar “Pjetër Luka 62 vjeç, banues në Grykë Lumi, Tale, me detyrë kryetar i këtij fshati, për të cilin Gjykata e Shkallës së Parë Lezhë ka caktuar masën e sigurisë “Arrest në burg”, për veprën penale “Falsifikimi i dokumenteve”.
Policia njoftoi se kryeplaku dyshohej se kishte lëshuar dokumente të falsifikuara, me qëllim tjetërsimin e pronave brenda në lagunë, në favor të të tretëve. “Gjatë kontrollit në banesën e tij, shërbimet e Policisë kanë gjetur dokumente të ndryshme të dyshuara të falsifikuara (me të dhëna të rreme)”, thuhet në njoftim.
I pyetur nga BIRN nëse ishin identifikuar përfituesit e pronave të tjetërsuara Sabri Kastrati prokurori që po drejton hetimet tha se bëhej fjalë për një “çështje shumë komplekse”. Kastrati shtoi se hetimet vijonin dhe se ishin shumë persona të tjerë që kishin përgjegjësi për tjetërsimin. Ai tha se prokuroria ka sekuestruar dokumentacion të 10 vjetëve të fundit dhe se sipërfaqja e tjetërsuar është e madhe.
Një muaj më parë për të njëjtat akuza u vu në pranga dhe Drejtori i Zonave të Mbrojtura në Lezhë Pjetër Toni, ndaj të cilit më pas gjykata vendosi masën e sigurisë “Arrest në shtëpi”. Ky nuk është hetimi i parë për tjetërsimin e pronave në Lezhë. Prokuroria e Rrethit ka sekuestruat më herët qindra hektarë të tjetërsuara në zonën e Ranës së Hedhun. Ndërkohë zyrtarë të lartë lokalë, përfshi ish-kryebashkiakun, ish-kreun e Qarkut të Lezhës janë dënuar në shkallë të parë për tjetërsim të bregdetit. /BIRN/
Discussion about this post