Është arrestuar pedagogu në Akademinë e Policisë, në pranga ka rënë edhe një student. Shërbimi për Çështjet e Brendshme dhe Ankesat ka vënë në pranga pedagogun në Akademinë e Policisë dhe një student të kësaj Akademie. Bëhet fjalë për pedagogun Qetësor Gurra i cili është arrestuar për akuzën e korrupsionit.
Ende nuk është bërë i ditur emri i studentit të arrestuar dhe akuza ndaj tij. Burimet thonë se në pranga ka rënë edhe një student. Arrestimi vjen një ditë pasi rreth 500 aplikantë iu nënshtruan provimit për të qenë pjesë e Policisë së Shtetit.
Vendimi i GJPKKO për masën e sigurimit ndaj këtyre punonjësve të policisë u mor pas hetimeve disa mujore të kryera nga Drejtoria e Hetimit të SHÇBA nën drejtimin e Prokurorisë së Posaçme, në funksion të procedimit penal Nr. 382/2021 për veprat penale të “Ushtrimit të ndikimit të paligjshëm nga persona që ushtrojnë funksione publike” dhe “Falsifikimit të dokumentave”, parashikuar përkatësisht nga nenet 245/1 dhe 186/1 i Kodit Penal.
Gjatë hetimeve të kryera është mësuar se dy punonjësit e policisë jepnin premtime dhe favorizonin në mënyrë të padrejtë kandidatët që konkurronin në testimin për gradën “Nënkomisar” në Akademinë e Sigurisë për vitin 2021.
Pedagogu Gurra dhe trupa e shërbimit të Autostradave në Qarkullimin Rrugor në procesin e konkurimit kanë depozituar dhe përdorur dokumente të falsifikuara me qëllim përfitimin e padrejtë të pikëve në kualifikimin përfundimtar të konkurrentëve.
Në funksion të hetimeve të kryera dhe të ekzekutimit të vendimeve penale të GJPKKO, u kryen kontrolle banesash, zyrash nga të cilat u sekuestruan prova materiale që dokumentojnë veprimtarinë e kundraligjshme të të arrestuarve.
Discussion about this post