Policia amerikane ka ndaluar shoferin e një kamioni, i cili u përplas të hënën në mbrëmje me barrierat e sigurisë në Sheshin Lafayette pranë Shtëpisë së Bardhë.
“Shoferi mund të ketë goditur qëllimisht barrierat e sigurisë. Nuk ka pasur lëndime në asnjë personel të Shërbimit Sekret apo të Shtëpisë së Bardhë dhe shkaku dhe mënyra e rrëzimit mbeten nën hetim,” shkroi në Twitter të hënën në mbrëmje Anthony Guglielmi, shefi i komunikimit për Shërbimin Sekret të SHBA.
Disa rrugë dhe vendkalime për këmbësorë u mbyllën dhe hoteli aty pranë Hay Adams u evakuua me kërkesë të Shërbimit Sekret, ndërsa pamjet e mediave lokale publikuan video të drejtpërdrejta nga ngjarja.
Sipas njoftimit të policisë amerikane, i dyshuari po akuzohet për kërcënim me vrasje, rrëmbim apo shkaktim i lëndimeve ndaj presidentit, nënpresidentes apo familjarëve të tyre. Autoritetet nuk kanë bërë të ditur identitetin e të dyshuarit.
Sipas një dëshmitari që foli për Reuters, automjeti, që i dyshuari kishte marrë me qira, u përplas në rrethojat e sheshit Lafajet, që gjendet pranë Shtëpisë së Bardhë. Hetuesit i kanë gjetur të dyshuarit një flamur me simbole naziste.
I arrestuari po ashtu po përballet me akuza të sulmit me armë të rrezikshme, dëmtim të pronës private dhe drejtim të pakujdesshëm të automjetit.
Televizioni WUSA transmetoi një video të policisë duke iu afruar një automjeti të tipit U-Haul. Në video shihet se si dera e këtij automjeti hapet nga një robot i telekomanduar.
Discussion about this post