Nga Bekim Bici
Arroganca që po vret…
Vrasja (nëpërmjet mbytjes) e një të riu në Kosovë, i cili në pamjet e nxjerra rezulton që po dilte me duart pas koke e në gjunjë për t’iu dorëzuar policisë, është një alarm që duhet ngritur jo vetëm për Kosovën, por edhe Shqipërinë. Policia andej e këndej kufirit, mendon se është e gjithpushtetshme, duke ‘harruar’ të drejtat e individit, e detyrat e saj.
Kjo arrogancë që vjen nga një pushtet me mendësi komuniste, ka sjellë raste të tilla edhe në vendin tonë, ku mos të harrojmë vrasjen e Klodian Rashës në prag të derës së tij. Arroganca shkon edhe më tej tek Policia Bashkiake, e cila dhunon pa respektuar as të drejtat minimale, të disa të moshuarve që duke shitur pras, domate, a tranguj të këputura nga bahçja e tyre, mundohen të nxjerrin një vakt për familjen. Arrogancë nga policia rrugore, arrogancë nga inspektorët e IKMT, arrogancë nga Policia Kufitare, arrogancë, arrogancë, arrogancë…. Në çdo nivel të pushtetit lokal e qëndror, qytetarët përballen me arrogancë. Një arrogancë që sot po vret.
Kjo arrogancë e pushtetit, e veshur me vetëkënaqësi, vrau Agon Zejnullahun, përkundër shkeljeve që ai mund të ketë bërë. Vetëdorëzimi i tij, që has me arrogancën e dhunën policore është e frikshme. 5 efektivë në garë kush do të mund të mbysë një 27 vjeçar, i cili me duar pas koke, pasi përballet me arrogancën e dhunën e policisë, instinktivisht kundër-reagon.
Sot kjo situatë është emergjente.
Arroganca nuk sjell vetëm dëme financiare, korrupsion, vjedhje shtetërore, por sot po sjell vdekjen e qytetarëve, të cilët në kushtet normale do të duhet të mbroheshin nga policia, e jo të mbyten me shkelm në pas qafe, prej policisë.
Sot në vend të që besosh e të telefonosh Policinë për ndihmë (numri në shumicën e rasteve është i zënë për orë të tëra), duhet të marrësh masa të mbrohesh prej tyre. Sot policia nuk të mbron, por… të dhunon dhe vret.
Kjo nuk është policia për të cilën luftuan mijëra heronj të Dardanisë e Shqipërisë.
Arroganca e pushtetit vret!!!
Discussion about this post