Dy persona janë vënë në pranga nga policia e Elbasanit pasi i janë gjetur dhe sekuestruar armë të ndryshme, shuma të konsiderueshme parash dhe lëndë narkotike.
Blutë bëjnë me dije se në kuadër të operacionit “Dëshiran” të zhvilluar nga strukturat hetimore dhe Forca e Posaçme “Shqiponjat” u arrestuan Aqif Bezati dhe Veli Deliu, të dy banues në fshatin Deshiran, Belsh.
Gjatë kontrollit në banesën e Bezatit janë gjetur dhe sekuestruar: një armë zjarri kallashnikov, një pistoletë, 6 granata dore, 3280 fishekë pistoletë dhe kallashnikovi, 5 krehra fishekësh, 3.6 kilogramë kanabis, 75 bimë të thata të dyshuara opium.
Gjithashtu, në banesën e Bezatit janë gjetur dhe sekuestruar edhe 3.760.000 lekë të rinj, 5000 paund dhe 8950 euro, të cilat dyshohet se ky shtetas i ka përfituar nga veprimtaria kriminale në fushën e narkotikëve dhe të trafikimit të armëve.
Në vijim, shërbimet e Policisë kanë ushtruar kontroll në banesën e Deliu ku janë gjetur dhe sekuestruar një armë gjahu dhe 55 fishekë arme gjahu, të cilat shtetasi Deliu i mbante pa leje.
Nga hetimet e kryera ka rezultuar se Bezati ushtronte veprimtari kriminale në fushën e kultivimit, prodhimit dhe shitjes së lëndëve narkotike. Nën drejtimin e Prokurorisë vijon puna për dokumentimin e plotë të kësaj veprimtarie kriminale, identifikimin dhe kapjen e personave të tjerë të përfshirë.
Discussion about this post