Shkodra nuk i bindet apeleve për t’u vaksinuar. Teksa shkollat kanë hapur dyert për nxënësit, ndërsa zyrtarisht procesi mësimor nis në datën 27 shtator, në Shkodër ende janë 450 mësues të pa vaksinuar.
Drejtoresha e njësisë vendore të kujdesit shëndetësor, Xheni Halili thotë se janë 30% e sistemit arsimor parauniversitar në Shkodër të pa vaksinuar.
“Në të gjitha qendrat shëndetësore, në bazë të raportimeve që kemi, po paraqiten edhe mësuesit e pedagogët që nuk kanë qenë të vaksinuar deri në këto momente. Në arsimin parauniversitar, ne llogarisim një shifër prej 30% të pavaksinuar mësuesa, ndërsa në arsimin universitar janë 40% e pedagogëve të pavaksinuar.” – thotë Halili
Drejtoresha e njësisë vendore të kujdesit shëndetesor u kujtoi atyre si dhe pedagogëve e studentëve që të nxitojnë për t’u vaksinuar, pasi në të kundërtën nuk do të lejohen të zhvillojnë mësim.
“Në bazë të vendimit të komitetit teknik të ekspertëve, mësuesit që paraqesin komplikacione mjekësore, duhet të paraqesin letrën e mjekut të familjes që më pas do verifikohet në institutin e shëndetit publik që nuk mund të vaksinohen. Ndërsa, pjesa tjtër duhet të vaksinohet deri me datën 30 shtator ose të paraqesin testin PCR në mënyrë peiodike.”- u shpreh Halili
Sa i takon studentëve Halili thotë se ka patur një ndërgjegjësim të tyre per kryerjen e vaksinës.
“Për studentët mund të themi se ka një sensibilizim të jashtëzakonshëm të secilit prej tyre, për t’u vaksinuar”.- tha Halili
Pritet për t’u parë ne ditet vijuese se si do të procedohet me arsimtaret qe nuk do i nenshtrohen kryerjes së vaksinës.
