Është ndarë nga jeta në moshën 87-vjeçare piktori i muraleve dhe afreskeve të Kishave të Shkodrës, Malit të Zi dhe Kosovës, Pjerin Sheldija. Ai që prej vitit 1990 iu dedikua vullnetarisht pa kërkuar shpërblim monetar artit të pikturave të muraleve të kishave katolike. Sheldija u vlerësua me distinktivit e “Kryqit të Shenjtë” edhe nga Papa Benidikti 16, për kontributin e tij të madh në shërbim të kishës katolike!
Vepra e tij shtrihet në një hark kohor prej mëse 60 vitesh. Fillimisht, me të mbaruar studimet, punoi ndër agjencitë e kohës ku, i detyruar nga tematika të diktuara prej pushtetit, vizatoi “djallin vetë”, sikurse shprehet. Edhe gjatë asaj periudhe, piktura e tij u vlerësua shumë si e ndryshme nga ajo e njëtrajtshmja e realizmit socialist. Duke qeshur, kujton një histori shumë interesante për atë periudhë: “Isha i detyruem me vizatue diçka për Pavarësinë. Nuk dosha me ba ngirtjen e flamurit në Vlonë, mbasi ate e bashin te tanë. Kështu, bana ngritjen e flamurit në Shkodër, nji vjet pas atij të Vlonës. Sikurse dihet, në Shkodër flamurin e ngriti Padër Prendushi. Por unë nuk mujta me e ba të veshun prift. Sa erdhi viti 90, gjeta ate pikturë me të cilën kisha ba nji padrejtësi që e kujtosha çdo ditë, dhe e vesha Prendushin prift.”
Ai e pranon se të tillë kompromise ishte i detyruar të bënte, pasi në të kundërt mirë që nuk do të lejohej të ushtronte artin e tij, por mund edhe të dënohej. Ka pafund piktura që çdo “faj” të bërë me të tillë kompromise i’a zerojnë! Ndër to mjaft të përmenden “Mundimet e Krishtit”, 14 tablo të bëra kushedi sa herë për kushedi sa kisha, përfshirë atë të fretërve dhe vetë Katedralen e Shkodrës, kishën katolike më të madhe në Ballkan.
Discussion about this post