Është ndarë nga jeta ditën e enjte shkrimtari i njohur shqiptar Nasho Jorgaqi. Nasho Jorgaqi lindi në vitin 1931 në Fier, ai ishte shkrimtar, skenarist, hulumtues dhe studiues shqiptar, doktor i shkencave dhe titullar, është i njohur me titullin “Mjeshtër i Madh i Punës”.
Ai gjithashtu ishte autor botimesh letrare, skenarësh filmash, përkthimesh dhe botimesh shkencore. Disa nga botimet e tij janë: Antologji e mendimit estetik shqiptar, Hajku, Një Histori Dashurie, Zgjime shpirtërore, Përrallat e gjyshit, Perla të mendimit botëror (Mozaik aforizmash), Migjeni në kujtimet e bashkëkohësve, Jeta e Fan S. Nolit II, Koha e kujtimeve, etj.
Sipas dokumenteve, Jorgaqi u rekrutua si informator nga Sigurimi i Shtetit më 10 janar 1955 me nofkën “Dragoi”, për pesë vjet qe “polic” i studentëve dhe rretheve letrare që shfaqnin pikëpamje “dekadente, reaksionare e pesimiste”, në varësi të seksionit të tretë të Drejtorisë së Punëve të Brendshme. Spiunimet e para ishin kundër Kadrie Kadaresë dhe Robert Shvarcit në Institutin Pedagogjik 2 vjeçar “Aleksandër Xhuvani” në Tiranë.
Më pas u drejtua nga ndërmarrja e botimeve, ndërsa më 1960 kaloi në varësi të Degës së 12-të të Drejtorisë së Sigurimit të Shtetit, e cila mbulonte legatat e huaja në Tiranë. Më 13 tetor 1961 nga informator u bë agjent.
Përmendet në dokumentet sekrete të Qani Tartales, një punonjës i Sigurimit të Shtetit, si informator kundër shkrimtarit Bilal Xhaferri.
Nga 1967 deri më 1973 nuk qe i përfshirë në rrjetin sekret, deri kur thirret sërish në detyrë për të mbikëqyrur shkrimtarët e ardhur nga Kosova. Më 1978 u bë rekrutues dhe ndërlidhës, aktiviteti i tij mbaroi më 1991.
Discussion about this post