Në Deçan ka përfunduar realizimi i një murali monumental të piktorit shqiptar nga Dibra, Bledar Cakalli, një artist i njohur për veprat e tij murale që ndërthurin artin figurativ me tematikat historike. Vepra e re, e vendosur në rrugën “Luan Haradinaj”, paraqet momentin e transportimit të të plagosurve gjatë luftës, një skenë që përçon sakrificën dhe humanizmin e Ushtrisë Çlirimtare të Kosovës.
Projekti u iniciua nga Organizata e Veteranëve të Luftës së UÇK-së, dega në Deçan, me kërkesën e paraqitur më 8 korrik 2025 dhe mori mbështetjen e Komitetit për Politikë dhe Financa të komunës dy ditë më vonë. Vendimi parashikoi financimin e muralit “Siluetë kushtuar UÇK-së”, një vepër e cila synon të bëhet simbol nderimi dhe kujtese për brezat e ardhshëm.
Krijimtaria e Cakallit në Kosovë shënon një tjetër hap në misionin e tij për të dokumentuar me ngjyra figurat dhe momentet kyçe të historisë shqiptare. I ardhur nga Bulqiza dhe i njohur për muralet që ka realizuar në mbarë Shqipërinë, ai e ka shndërruar edhe këtë herë murin në një dëshmi të fuqishme vizuale, duke i dhënë artit rolin e urës që lidh trashëgiminë e luftës me identitetin kombëtar.
Discussion about this post