Kryeministri Edi Rama duket në një pozitë të vështirë, veçanërisht pasi ish-zv.Kryeministri arriti të largohej nga Shqipëria, ndërsa SPAK i kërkonte Kuvendit autorizimin për arrestimin e tij.
E ndërsa opozita kërkoi një mocion me debat urgjent me Kryeministrin, kërkesë e cila u rrëzua nga mazhoranca socialiste me forcën e kartonit, Edi Rama shmangu sot pjesëmarrjen në seancën e fundit parlamentare.
Fillimisht Rama zgjodhi të japë këshilla për BE-në se si duhet zgjidhur përplasja Kosovë-Serbi dhe më pas u shfaq në jug të vendit duke bërë show, bashkë me Belinda Ballukun, e cila disa orë më pas u shfaq në seancë plenare.
Ndërkohë analisti Dritan Hila, i njohur për qëndrimet pro Qeverisë dhe kritik i fortë ndaj opozitës, pohoi në emisionin “Open” se Kryeministri ka përgjegjësi politike në lidhje me Arben Ahmetajn.
Por, ai shtoi se kërkesa e opozitës për mocion me debat më shumë ishte për të bërë show, sesa si për të zgjidhur diçka mbi këtë çështje.
“Çështja Ahmetaj kërkon një hetim, është përtej interpelancës. Ka kosto politike sepse është numri dy i qeverisë që është arratisur.
Është ndër aktet e turpshme, që Rama e ka ditur shumë mirë se kush ka qenë ky. Është hequr nga Nano për shkak të përfoljes së tij për korrupsion. Rama ka përgjegjësi politike për të, por nuk mund të zgjidhet në Parlament ku opozita kërkon të bëjë spektakël”, shprehet Hila.
Pak a shumë të njëjtin qëndrim shfaq edhe Kryeministri Edi Rama, i cili është mjaftuar me postimet në rrjetet sociale lidhur me çështjen Ahmetaj, ndërsa shmang llogaridhënien në Kuvend.
Discussion about this post