“As në Guinness s’ka rekord të tillë”, Berisha nga Elbasani: Lubi Balluku lan makinën me 10 mijë euro në muaj

Në prezantimin e kandidatëve të koalicionit “PD – Aleanca për Shqipërinë Madhështore” për Qarkun Elbasan, lideri demokrat Sali Berisha lëshoi akuza të forta ndaj qeverisë, duke u ndalur veçanërisht te ministrja Belinda Balluku dhe stili luksoz i jetesës së saj.

Sipas Berishës, qeveria e Edi Ramës është zhytur në luks ekstrem, ndërsa qytetarët përballen me varfëri të thellë. Ai denoncoi ministren Balluku duke deklaruar se “lan makinën e saj me 10 mijë euro në muaj”, një shifër që sipas tij do të ishte rekord edhe për Librin e Guinness-it.

“Me këto para, Lubi Balluku dhe Maznik Ndragheta ulen në tavolina me 1 mijë euro bifteku. Këta njerëz prej 12 vitesh, si shushunja, i kanë shkatërruar dhe varfëruar shqiptarët,” – u shpreh Berisha para mbështetësve në Elbasan.

Në fjalimin e tij, ai vijoi me kritika ndaj kryeministrit Edi Rama, duke përmendur stilin e jetesës së tij dhe shpenzimet luksoze që sipas tij janë bërë në kurriz të qytetarëve: “Rama shëtit me avion taksi, 21 milionë euro në dy vite. Me 4 mijë euro kursime u bë me saraje. Shplodh sytë me peshqit dhe bimët ekzotike në oborrin e Kryeministrisë.”