“Skualifikim i të gjithë operatoreve konkurrues përveç fituesit”, kjo është mënyra e përdorur nga komisioni i Kreshnik Hajdarit për të mbyllur tenderin 234 milionë lekë për asfaltimin e disa rrugicave në Kuçovë.
Para zgjedhjeve të vitit të ardhshëm, bashkia Kuçovë po hedh asfalt në disa rrugë të harruara, ndërkohë që kryetari i ndan këto lekë me procedura të dyshimta prokurimi.
Këto 234 milionë lekë janë planifikuar për të riparuar rrugicat në lagjen 1 Maji në Kuçovë.
Bëhet fjalë për tenderin me objekt ‘Rikualifikimi i rrugëve Mersin Dyrmo, Nënstacioni, Lord Bajron, Riza Alizoti’. Sipas dokumentit, do të shtrohen me asfalt këto 4 rrugica që në total kanë shtrirje 1.6 km.
Më tutje theksohet se këto kanë nevojë për kanalizime dhe shtresën a asfaltit, pasi janë krijuar gropa nga amortizimi ndër vite. Për të përfunduar 4 rrugicat do të duhen 4 muaj, praktikisht nga një muaj për secilën. Duket se Hajdari e ka fryrë fondin limit, po të kemi parasysh se këto janë rrugë me gjerësi deri në 4 metra.
Jo vetëm kaq, por në preventivin e punimeve nuk janë përfshirë as trotuare, as ndriçim, as sinjalistikë rrugore, as mbjellje pemësh anash tyre. E po kështu e kanë projektet para zgjedhjeve, punë shkel e shko, sa për të mashtruar zgjedhësit.
Kjo kontratë është vlerësuar me “Flamur të kuq”.
Tashmë e dimë që Open Data Albania vendos këtë shenjë për ato prokurime ku ka një risk të lartë korrupsioni për fondin limit.
Stafi i Hajdarit ka përjashtuar 10 kompani që të favorizonte firmën “Avduli” shpk, me ofertë 180 milionë lekë. Në fakt, SHKELQIMI 07” shpk “ARDMIR” shpk dhe “RSM COMPANY” shpk kishin ofertat më të ulëta, por të tria këto janë përjashtuar të parat me argumentin se kanë oferta anomalisht të ulëta apo gabime aritmetike tek preventivi.
Nga ana tjetër, nëse llogaritet një fond i fryrë, ofertat normale do të duken “anomalisht të ulëta”. Si përfundim, kryetari Hajdari i ka skualifikuar edhe ofertat e tjera, duke ia dhënë pa garë kontratën firmës së Arben Avdulit.
Pronarit të kësaj kompanie i ka ecur mirë biznesi me zyrtarët e bashkive, qysh kur denoncoi ish-kryebashkiakun Fatos Tushe për korrupsion në një tender, ku merrte pjesë Avduli. Tushe u arrestua nga SPAK dhe u dënua më pas me burg.
Nëse e krahasojmë, edhe Tushe bënte të njëjtën gjë si kryetari Hajdari me tenderat. Por kryebashkiaku i Kuçovës ndoshta mendon se SPAK nuk do të merret sërish me të, meqenëse sapo ka marrë një dënim për fshehjen e të kaluarës penale në Greqi.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
Discussion about this post