Bashkia Shkodër me kryetare Voltana Ademin ka zhvilluar një tjetër tender ku janë skualifikuar të gjithë konkurrentët përveç fituesit. Në procedurën e hapur në datën 5 janar 2022, bashkia parashikon sistemim, asfaltim, rrugë të brendshme në Dobraç, ku përfshihet rruga Çeliku, Dinaj, Haxhi Zeneli.
Ky tender mban numrin e referencës REF-16843-12-31-2021 dhe ka fondin limit prej 13 323 678 lekëve të reja, ose rreth 133 milionë lekë të vjetra.
Në këtë tender kanë marrë pjesë 5 kompani, “S.M.O.UNION” sh.p.k, ”Grama”sh.p.k, “VARAKU E” sh.p.k, “Lacaj”sh.p.k, “Delia Impex” sh.p.k
Sipas dokumentit të siguruar nga gijotina.com, vërtetohet se 4 kompani prej tyre, janë skualifikuar dhe tenderi është kryer vetëm me kompaninë LACAJ SHPK. Kjo firmë kishte dorëzuar ofertën prej 12 603 956 lekë të reja.
Cilët u mënjanuan nga gara?
Në këtë prokurim u skualifikuan ofertat më ekonomike dhe fitoi më e larta. Kështu operatori ekonomik “S.M.O.UNION” sh.p.k, ka ofruar t’i kryejë punimet me 8,972,639 leke pa tvsh. ”Grama”sh.p.k, ka propozuar vlerën 11,335,305 lekë pa tvsh . “VARAKU E” sh.p.k. ka paraqitur ofertën 11,456,896 leke pa tvsh
Oferta më e lartë është 12,603,956 leke pa tvsh dhe është bërë nga kompania fituese Lacaj me administrator Bashkim Lacajn. Ndërsa “Delia Impex”sh.p.k, nuk ka paraqitur ofertë.
Pse u skualiafikuan të gjithë (veç fituesit)?
Përveç fituesit të tenderit, të gjithë pjesëmarrësit janë skualifikuar. Shkaqet gjenden, kur fituesi është paracaktuar nga organizatori i tenderit. Kështu, “S.M.O.UNION”sh.p.k u hoq nga gara se “nuk ka paraqitur analizat e çmimeve brenda afatit te përcaktuar nga AK”. “ Grama” u skualifikua se “stafin drejtues dhe makineritë i ka të angazhuara në objektin: Sistemim asfaltim në fshatin Shtoj i Vjetër-Guci e Re”.
Akoma më e çuditshme është arsyeja e paraqitur për skualifikimin e operatorit “ VARAKU E” sh.p.k. Sipas komisionit, “Referuar listëpagesës së muajit dhjetor 2021, rezulton se të gjithë punonjësit e deklaruar në formularin e vetdeklarimit kanë të njëjtin profesion, kanë kode të ndryshme”.
Kështu, në ditët e fundit të pushtetërimit të saj në krye të bashkisë Shkodër, Voltana Ademi ka firmosur këtë tender që dyshohet se shkel parimin e barazisë dhe dëmton buxhetin e shtetit.
Ky prokurim është shoqëruar nga “Open Data” me flamurin e kuq duke ngritur shqetësimin për skualifikimin e të gjithë kompanive përveç fituesit.
Kujtojmë se zgjedhjet e reja për kryetarin e Bashkisë Shkodër zhvillohen në 6 mars 2022 dhe Voltana Ademi është tërhequr nga rikandidimi. Ndoshta ka qenë shumë e angazhuar me tenderë të tillë. A.L /gijotina.com
Discussion about this post