Agjencia e Ushqimit dhe Veterinarisë së Kosovës (AUV) ka asgjësuar 2 mijë e 934 kilogramë tranguj të konservuar, pasi në to janë zbuluar mbetje të pesticidit Chlorpyrifos.
Raportohet se trangujt janë përpunuar në Mamushë dhe do të eksportoheshin në Slloveni.
Në njoftim thuhet se AUV ka ndërmarrë masat e menjëhershme për mbrojtjen e shëndetit të konsumatorëve, përfshirë: identifikimin dhe bllokimin e produktit të prekur si dhe koordinimin me institucionet relevante brenda dhe jashtë vendit, në përputhje me procedurat e sistemit RASFF, raporton KosovaPress.
Nga veprimet e ndërmarra sipas njoftimit të RASFF, është konstatuar se loti numër 090827, në sasinë prej 2934,70 kg tranguj të prerë dhe të konservuar, ka qenë e përgatitur për eksport në Slloveni dhe si e tillë, është asgjësuar në prani të zyrtarëve të AUV-së dhe palës përkatëse, konform legjislacionit në fuqi.
AUV njofton qytetarët e tranguj të tillë nuk gjenden në tregun e Kosovës dhe se situata është plotësisht nën kontroll.
Discussion about this post