Kryeministri Edi Rama ka reaguar sërish në profilin e tij zyrtar për këngëtarin serb Goran Bregoviç. Më herët, Rama krahasoi qëndrimet e serbëve për këngëtaren shqiptare Dua Lipa me reagimet e shqiptarëve për koncertin e këngëtarit serb në Korçë Goran Bregoviç. Ndërsa sot shkruan se nuk barazoi Dua Lipën me Goran Bregoviçin.
“Ashtu siç bënë Bregoviçin kriminel serb pa asnjë fakt, tani sokëllijnë që unë paskam barazuar Dua Lipën me të! Dhe histeria vazhdon por jo, unë nuk kam barazuar hiçfare Dua Lipën me Goran Bregoviçin, po kam thënë me një shembull të vërtetën e hidhur se të barabartë, njësoj krejt janë ata që shajnë e mallkojnë, në serbisht a në shqip, artistët e sportistët me emër të palës tjetër! Histeri fashiste që as nuk e mbron, as e nderon, po vetëm e turpëron shqiptarinë, e cila s’mund të jetë kurrë shëmbëlltyrë e urrejtjes!”, shkruan Rama.
Kreu i qeverisë ende nuk ka asnjë reagim për masakrën në Lushnje, ku u ekzekutua me mbi 20 plumba biznesmeni Bledar Muça dhe u plagosën 5 persona të tjerë. /Gijotina.com
