Ish-deputeti demokrat Astrit Patozi, ka deklaruar ditën e sotme se nuk mendon rikthimin në PD, pasi partisë nuk i duhen më ata që janë larguar përgjatë viteve nga kjo parti, duke marrë parasysh gjendjen në të cilën është katandisur ajo. Ndër të tjera, ai tha se PD e ndarë në dy kampe është në gjendjen më të keqe të saj, duke theksuar se ai nuk do të shkojë kurrë në një parti që nuk e dëgjojnë dhe janë të shpërndarë.
“Unë mendoj që ne që kemi qenë pjesë e Partisë Demokratike, as na duhet dhe as i duhemi kësaj partie, në këtë derexhe ku e ka katandisur veten. Partia Demokratike nuk ka nevojë për njerëz që mendojnë me kokën e vet. PD-ja sot është e ndarë në dy kampe: një pjesë janë kryqtarët e Berishës dhe të rrethuarit në kështjellë të Lulzim Bashës. Unë nuk mund të shkoj diku ku nuk të dëgjojnë dhe nuk kanë kohë për zëra të ndryshëm. PD-ja duhet të mbyllë një herë betejën e brendshme, të dalë “pronari” i saj dhe pastaj ai të mendojë se çfarë do të bëjë në të ardhmen. Kjo betejë është përligjja ekselente e kryetarokracisë. Në PD po zihen se kush është pronari i vetëm i PD-së”, deklaroi Patozi.
Sipas tij, PD do të forcohet vetëm atëherë kur në të ketë persona të fortë dhe të përshtatshëm që mund të garojnë vërtetë me njeri-tjetrin dhe jo të hahen për pushtet. “Demokratët kanë nevojë që të kenë garë në partinë e tyre. Nuk zgjidhet duke marrë këdo që ka ikur nga PD-ja dhe të bëhet një bashkim mekanik. Ndoshta, askush prej nesh nuk është më i nevojshëm. Nëse PD hap garën brenda vetes dhe ka garë reale, sigurisht që vëmendja do të jetë më e madhe, por edhe dëshira për të kontribuar do të jetë më e madhe. Kjo nuk ka të bëjë me personat”, shtoi ai.
Kujtojmë se pak më parë, Patozi ka thënë se edhe kthimi i Berishës nuk përbën ndryshim, duke u shprehur se ish-kryeministri duhej të kishte reaguar kur Basha largoi disa deputetë nga PD.
Discussion about this post