Nënkryetarja e PD-së Grida Duma i është bashkuar listëts së politikanëve që kanë uruar pavarësinë e Shqipërisë duke dhënë një mesazh për atë që përcakton misionin dhe detyrën e shqiptarëve.
Duma shkruan në Facebook se atdheu shenjohet në ADN-në tonë dhe pavarësimi i çdo shqiptari nga varfëria, është detyra e politikanëve.
“Të gjithë kemi një detyrë ndaj atdheut, të vegjël a të mëdhenj, atdheu shenjohet në ADN-në tonë. Na përcakton “çfarë” e “kush” jemi. Pavarësia e vendit ishte nisja, mbërritja është liria e mendësisë së shqiptarit. Ka vargonj pushtuesish; ka vargonj nevojash! Shqiptarët sot varen ende nga vargonjtë e varfërisë. Pavarësimi i çdo shqiptari nga varfëria, edhe shqiptarit në periferinë më të largët, është detyra jonë! Çlirimi i çdo shqiptari nga mendësitë e shkuara, të varësisë ndaj autoritarizmit e mentalititetit të një bote të mbyllur me kulte individësh, është misioni”, shkruan Duma.
Kujtojmë se, shqiptarët këtë të dielë festojnë 109 vjetorin e krijimit të shtetit shqiptar, ku në 28 nëntor të 1912 është ngritur Flamuri në Vlorë nga Ismail Qemali.
Discussion about this post