Atentat mafioz ndaj dy shqiptarëve në Athinë, një i vdekur dhe një i plagosur (Emrat)

Një atentat me armë zjarri raportohet se ka ndodhur në Greqi ndaj dy shqiptarëve, ku njëri ka ndërruar jetë, ndërsa tjetri është plagosur.

Mediat greke shkruajnë se ngjarja e rëndë ka ndodhur në sheshin Thrakomakedonon në Athinë, jashtë ambienteve të një lokali.

Informacionet bëjnë me dije se ka një të vdekur me origjinë shqiptare dhe një të plagosur.

Viktima është identifikuar si Irakli Davella, pronar i një lokali në zonën Peristeri të Athinës.

Irakli Davella, viktima e sotme e atentatit në Athinë konsiderohet një personazh i lidhur prej vitesh me botën e krimit në Greqi.

Ai rezulton të ketë qenë miku i 3 personazheve të tjerë të ekzekutuar në Greqi vitet e fundit, konkretisht mafiozëve grekë Manolis Karagiannis, Vasili Griva dhe Giorgo Litsa.

Tre të fundit bashkë me Davellën kishin krijuar vite më parë një grup kriminal që vepronte në Athinë.

Ndërsa personi tjetër, Edi Lolo ka marrë plagë dhe është dërguar me urgjencë në spital. Ai ka marrë plagë në kokë dhe bark.

Vrasja ndodhi në sy të dhjetëra njerëzve që lëviznin në zonë, nga autorë ende të panjohur të cilët thuhet se iu afruan viktimave duke i qëlluar nga një distancë e shkurtër përpara se të largoheshin.

Forca të forta policore kanë shkuar në vendngjarje dhe po kryejnë hetimet për zbardhjen e ngjarjes.

Burime policore flasin për një ekzekutim mafioz, pasi i ndjeri është qëlluar me plumb në kokë, ndërsa i plagosuri ndodhet në gjendje shumë të rëndë.