Një nga personat e shpallur në kërkim për vrasjen e çiftit Mujeci ka reaguar publikisht, duke mohuar çdo përfshirje në ngjarjen e rëndë.
Në dëshminë e tij për “News 24″, Besnik Kolndreu shprehet se nuk ka asnjë lidhje me ngjarjen ndërsa shton se lajmin për krimin e ka mësuar përmes mediave.
Në banesën e tij u gjet një nga automjetet e përfshira në ngjarje, por 40-vjeçari pretendon se gjatë kohës që ka ndodhur atentati ka qenë rrugës për në Malin e Zi, atje ku edhe jetën e punon, së bashku me familjen. 40-vjeçari thekson se personat e dyshuar kanë hyrë vetë në ambient pa dijeninë e tij.
“Vrasjen e çiftit Mujeci e kam lexuar online. Personat e dyshuar e kanë hapur vetë portën. Në momentin e ngjarjes, unë me nusen dhe fëmijët kam qenë rrugës për në Mal të Zi sepse këtu punoj dhe jetoj prej 6 vitesh kur nusja ime duke parë në TikTok më tha: o Zot çfarë paska ndodhur… paskan vrarë çiftin Mujeci dhe aty kam mësuar për vrasjen. Tani dua t’u them diçka… jam 40 vjeç.. kam punuar 25 vite që në të 40-at të arrij të bëj një firmë ndërtimi.. që ata që më njohin e dinë mirë me çfarë mundimi. Si mundet dikush në këtë situatë si unë të shkatërrojë familjen, biznesin, veten, fëmijët, të bie dhe në gjak për një fis tjetër që nuk janë as Kolndreaj as xhaxhallarë, as vëllezër, as kushërinjtë e mi”, tha 40-vjeçari.
Beshnik Kolndreu shpreh shqetësimin se përfshirja e emrit të tij në këtë çështje mund ta ekspozojë ndaj konflikteve të mundshme, përfshirë edhe rrezikun e gjakmarrjes.
“Mua po më shkatërrohet e gjithë familja.. e ardhmja e fëmijëve të mi. Puna ime dhe i gjithë mundi i gjithë këtyre viteve, plus duan të më futin në gjak me një familje me të cilët kurrë nuk kemi patur problemin më të vogël. Prandaj i lutem shtetit që çështjen tonë ta shikojnë me imtësi dhe profesionalitet sepse këtu nuk është vetëm shteti dhe burgu ku duan të më futin pa patur asnjë faj, por dhe gjaku, dhe ne nuk duam të biem në gjak me askënd pa na pasur borxh dhe pa ju pasur borxh”, u shpreh ai.
Discussion about this post