Sekretari Organizativ i Partisë Demokratike, Klevis Balliu ishte i ftuar në News24, ku ka komentuar ngjarjet kriminale të ndodhura në vend brenda 24 orëve, teksa janë shënuar 4 viktima.
Sipas Balliut, siguria në vend ka rënë prej një kohe goxha të gjatë. Ish-deputeti demokrat akuzoi kryeministrin Edi Rama se ka lidhur marrëveshje me bandat për përfitime elektorale dhe këto vrasje që ndodhin anembanë Shqipërisë janë derivat i këtij pakti.
“Qeveria ka interesa të caktuara në banda të caktuara dhe i ndihmon të kryejnë vrasje dhe veprime të caktuara. Të gjithë e kanë të qartë se nëse qeveria do të luftojë krimin mund t’i kapë këta banditë. Nuk ka nevojë për fantazi. Gjatë qeverisjes së PD nën drejtimin e Sali Berishës janë arrestuar gati 200 banda dhe sot një pjesë e madhe e tyre janë sot në rrugë duke kryer këto krime. I vetmi standard që është rritur këto kohë është standardi i krimit, duke kaluar në vrasës profesionist, kemi kaluar në kryemafiozë, dhe nivele bandash. Bandat kanë armë, ne kemi tanke, kemi ushtrinë, kanë informacion, ne kemi Shërbimin Informativ Shtetëror, por Edi Rama ka lidhur koalicion me krimin e organizuar. Mos kujtoni ju se qytetarët nuk e dinë se kush drejton në Vlorë, Lushnje, Elbasan. Policia e di më mirë nga të gjithë po nuk lëvizin dot se Edi Rama u ka thënë mos i prekni”, tha Balliu.
Discussion about this post