Atentati mafioz në Tiranë, vëllai i Çalit zbulon 2 personat që kanë konflikte: Njëri na ka borxh…

Konfliktet për borxhe mund të ketë qenë shkak i ekzekutimit me armë zjarri i Iljaz Çalit mbrëmjen e djeshme në autostradën Tiranë-Durrës.

Vëllai i viktimës ka treguar për grupet hetimore se 37- vjeçarit i kishin borxh 1 milionë dollarë. Përkatësisht personi me iniciale Rr. D., prej tre vitesh nuk ia kishte shlyer këtë borxh Çalit.  Ai shton se Çali ishte nisur për në shtëpi rreth orës 22:00, por nuk mbërriti kurrë atje, pasi breshëria i preu rrugën dhe e la të vdekur në vend. Vrasjen, tregon i vëllai, se e mori vesh përmes mediave.

“Rreth orës 22 ai u largua për në banesë. Gjatë kohës që qëndrova në lokal ka pasur komunikime të vazhdueshme në telefon. Vrasjen e mësova prej mediave. Ne si familje nuk kemi hasmëri, por një borxh që shtetasi RR.D., na ka prej tre viteve në vlerën e tregut prej 1 milionë dollar për sasinë e 2400 tonëve krom. Herë pas here kanë pasur debate për këtë gjë. Po kështu kohët e fundit kemi pasur debate edhe me shtetasin I.C, i cili ka edhe ai një galeri kromi atje,”- tregon ai duke veçur dy persona si konfliktualët me familjen e tij që mund të kenë lidhje me ngjarjen.

Nga hetimet e deritanishme dyshohet se atentati ka qenë i mirëorganizuar dhe se autorët janë treguar të kujdesshëm për mos lënë gjurmë pas krimit. Ata e kanë ndjekur shënjestrën Iljaz Çalin derisa janë siguruar për vdekjen e tij brenda mjetit me të cilin ishte duke udhëtuar. Ngjarja ka ndodhur pak minuta para mesnatës, në një orar ku nuk ka lëvizje të qytetarëve. Errësira ka favorizuar autorët, për tu mos identifikuar lehtë.