Agjencia e Mbikëqyrjes Policore ka referuar materialet në Prokurorinë e Shkodrës ku akuzon efektivët e policisë së Shkodrës në lidhje me masakrën me 4 viktima në Dobraç. Ata akuzohen për shpërdorim detyre.
Sipas burimeve, AMP ka dyshime të forta se efektivët nuk kanë kryer detyrën duke lënë që të ikë nga vendngjarja personin e tretë që dyshohet se ishte në makinën e Hamza Licit dhe Arlind Bushatit.
Tashmë pritet që organi i akuzës të thellojë hetimet në lidhje me grupin e efektivëve që ishin në vendngjarje. Ende mbetet mister personi që del në video, ndërkohë që dyshohet se pikërisht ky person është Ibrahim Lici, vëllai i Hamza Licit.
Ka dyshime se Ibrahim Lici të jetë lënë nga efektivët që të largohet nga vendi i ngjarjes, ndërkohë që për autoritetet 32-vjeçari është një nga personat më të kërkuar për krime të rënda.
Masakra e Dobraçit nën hetim nga SPAK
Ndërkohë, dosja e “Masakrës së Dobraçit” në Shkodër ku humbën jetën Arlind Bushati, Hamza Lici dhe çifti i bashkëshortëve Bashkim dhe Flutura Basha i ka kaluar për hetim Prokurorisë së Posaçme Kundër Korrupsionit dhe Krimit të Organizuar. Prokuroria e Shkodrës ka dyshime se ngjarja është kryer nga një grup kriminal, vepër që është kompetencë e SPAK-ut.
Basha ishte duke lëvizur me motor bashkë me gruan e tij, Flutura Basha që vdiq atë ditë nga plagët e marra, kur u gjendën mes të një atentati me armë zjarri.
Objektiv i atentatit duket se ishin dy viktimat e tjerë Hamza Lici dhe Arlind Bushati, si dhe një tjetër që po lëvizte me ta në makinë, por që nuk është identifikuar ende nga autoritetet.
Nga atentati, 23-vjeçari Hamza Lici që ishte në drejtimin e makinës tip “Benz” humbi kontrollin e saj dhe përplasi çiftin e bashkëshortëve.
Deri më tani, policia ka përcaktuar dhe ka arritur të zbulojë se makina tip “Range Rover”, e përdorur në atentat është vjedhur në Durrës disa kohë më parë.
Grupi i hetimit është në kërkim të një personi që shfaqet në vendin e ngjarjes pak minuta pas vrasjes dhe besohet të ketë qenë në makinë me viktimat.
Grupi hetimor nuk përjashton që ai të jetë i shumërkërkuari Ibrahim Lici, vëllai i Hamzait që ishte në drejtimin e makinës tip “Benz” me targa korate që u qëllua me breshëri plumbash, teksa hakmarrja është pista kryesore e hetimeve.
I ati i një prej viktimave, Mustafa Lici ka akuzuar se pas vrasjes fshihet një “grup i lidhur ngushtë me qeverinë”. Ngjarja është prekur edhe nga politika, teksa në daljet e tij publike, kreu i PD-së Sali Berisha ka akuzuar se pas masakrës është dora e grupit të Bajrave, që njihen për armiqësinë me Licajt.
Discussion about this post