Rikthehet në skenë atentati me armë zjarri në Itali i shqiptarit Rexhep Uba. Mësohet se një 23-vjeçar shqiptar është dorëzuar në komisariatin e Italisë duke pranuar se është autor i plagosjes me armë zjarri të 48- vjeçarit. Identiteti i të riut nuk është bërë ende i ditur, ndërsa mësohet se pas konsultimeve me avokatin e tij mbrojtës është vënë në pranga.
Atentati ka ndodhur më 5 Tetor në Torino të Italisë, kur 48-vjeçari shqiptar Rexhep Uba mbeti i plagosur me armë.
Uba vite më parë ka qenë nën hetim së bashku me disa persona të tjerë si të përfshirë në trafikun e drogës nga Shqipëria drejt Torinos. Ai dhe bashkëpunëtorët e tij u arrestuan gjatë një aksioni anti-drogë në atë kohë dhe u sekuestruan tonelata lëndë narkotike që po transportoheshin me kamion.
48-vjeçari u qëllua me armë, raportohet se vëllai i Rexhep Ubës ndoqi në këmbë me vrap autorin e dyshuar. Ai ka qenë brenda makinës tip Fiat Panda të parkuar në anë të rrugës duke pritur vëllain. Kur pa se 48-vjeçari u qëllua me armë, vëllai i Rexhep Ubës doli nga mjeti dhe ndoqi me vrap autorin, por nuk mundi ta kapte. Policia italiane vijon hetimet për këtë ngjarje.
