Deputeti i PD, Arbi Agalliu ka reaguar për atentatin në Vlorë duke thënë se qyteti bregdetar është kthyer në një vend ku krimi i organizuar kryen ekzekutime në mes të ditës pa u shqetësuar nga asgjë. Ndër të tjera, thotë se Vlora i është dorëzuar krimit.
“Vrasjet vazhdojnë!!! Dy të vdekur dhe një i plagosur është bilanci i atentatit në hyrje të Vlorës! Qyteti i Vlorës është kthyer prej vitesh në qytet ku krimi i organizuar dhe ai ordiner kryejnë vrasje e vjedhje në mes të ditës pa asnjë problem. Qyteti i Vlorës me dhjetëra djem të zhdukur në këto vite i është dorëzuar aktivitetit kriminal”, tha Agalliu.
Geno (Shpati) Lena, 37-vjeç dhe Hakim Xhezo, 34 vjeç, janë ekzekutuar të enjten në mëngjes nga një atentat i mirëorganizuar në aksin Fier-Vlorë, në afërsi të mbikalimit të fshatit Panaja. Paraprakisht dyshohet se vrasja ka ndodhur për motive hasmërie. Brenda makinës së djegur janë gjetur 3 automatikë.
Discussion about this post