Atentati ndaj 2 policëve në Vlorë, identifikohen autorët

Janë identifikuar dhe shpallur në kërkim dy autorët që qëlluan ndaj dy policëve në Vlorë mbrëmjen e të premtes së 2 gushtit.

Dy efektivët janë qëlluar me armë zjarri ndërsa qarkullonin me një automjet privat i cili u sekuestrua pas ngjarjes. Në lagjen “Partizani” të qytetit, efektivët, Anxhelo Breshani, i Patrullës së Përgjithshme dhe Nako Mehmetaj,i Policisë Kufitare, ishin duke qarkulluar me një automjet tip “Audi”.

Sipas burimeve, efektivët udhëtonin me makinë pa targa dhe me xhama të zinj. Pesë gëzhoja janë gjetur në vendngjarje, të cilat u qëlluan nga një automjet në lëvizje po “Volkswagen”.

Në momentin e ngjarjes, punonjësit e Policë kanë qenë jashtë shërbimit, duke udhëtuar me automjet privat. Policia nuk e ka bërë publik identitetin e autorëve por është vënë në ndjekje të tyre.