Policia e Fierit ka shoqëruar disa persona të tjerë në polici për të bërë të mundur zbardhjen e plotë të atentatit ndaj biznesmenit Demir Backa. Mësohet se, në mesin e tyre është dhe Arben Isufajt, i njohur me nofkën Ben Qimja me të cilin viktima ka pasur konflikte, mirëpo nuk e kanë gjetur aty. Familjarët e tij janë shprehur se ndodhet në Tiranë për punë.
Policia ka shkuar 3 herë në banesën e tij, por nuk e ka gjetur, ndërsa i kanë dorëzuar një fletëthirrje që të paraqitet në polici për të treguar se ku ka qenë mbrëmjen e 23 tetorit.
Ngjarja e rëndë ndodhi të shtunën, në vendin e quajtur “Rrethrrotullimi i QTU-së”, në Fier, teksa viktima ndodhej në makinën e tij në parkingun e një qendre tregtare. Backa u qëllua 18 herë më armë. Tre plumba e kanë kapur në pjesën e qafës dhe kokës edhe 15 të tjerë në kraharor. 57-vjeçari mbeti i plagosur nga atentati dhe u dërgua në spitalin e Fierit, por nuk ka mundur t’i mbijetojë plagëve të marra dhe ka ndërruar jetë.
Tre persona morën pjesë në krimin për ekzekutimin e Backës, ndërsa dyshohet se vrasësit janë me origjinë nga zona e Krujës ose Laçit. Policia ka shoqëruar deri tani disa persona, por ende nuk ka asnjë informacion për kapjen e autorëve.
