Presidenti Ilir Meta ka reaguar ashpër lidhur me dy ngjarjet kriminale të ndodhura dy ditët e fundit në Fushë Krujë dhe në Fier. Kreu i shtetit shprehet se dënon me forcë aktet kriminale të vrasjes së biznesmenit Demir Backa në Fier dhe dhunimit të sipërmarrësit Nazmi Çangu në Nikël, duke kërkuar zbardhjen e ngjarjeve.
“Dënoj me forcë aktet tepër të rënda kriminale të ditëve të fundit, vrasjen e biznesmenit Backa në qendër të Fierit, si dhe grabitjen dhe torturimin e biznesmenit Çangu në Nikël të Krujës. Këto ngjarje, që kanë tronditur thellë opinionin publik, përbëjnë një kërcënim serioz për rendin, sigurinë e jetës dhe pronës së qytetarëve, por edhe për zhvillimet ekonomike dhe sociale të vendit”, shkruan Meta.
Në postimin e tij në Facebook, Meta i bën thirrje strukturave të Policisë si dhe të gjithë institucioneve të tjera ligjzbatuese në vend, të bëjnë të mundur arrestimin e autorëve, por edhe marrjen e masave efektive për të parandaluar ngjarje të tilla.
