Atentati ndaj drejtoreshës në Shkodër, pistat, si grupet kriminale tentuan ta gjobisnin

Lindin të tjera dyshime për përfshirjen e grupeve kriminale të Shkodrës  në atentatin e dështuar ndaj Suida Kukës, 28-vjeçares me profesion stomatologe. Bomba e sofistikuar me telekomandë ishte një “shpenzim” i madh për t’u lënë në tentativë. Ndërkaq, Suida Kuka, drejtoreshë e Operatorit të Kujdesit Shëndetësor në Shkodër ka deklaruar në polici se nuk kishte konflikt me askënd.

Policia nuk e ka ende të qartë se kush mund të ketë dashur ta eliminojë të renë apo nëse ka qenë thjesht një mesazh ndaj dikujt tjetër. Burime bëjnë me dije se deri më tani, policia është duke verifikuar vendimet e Kukës gjatë detyrës së saj si drejtore e Operatorit te Kujdesit Shëndetësor Shkodër për të zbuluar nëse gjatë kësaj periudhe ka qenë apo jo dikush i prekur prej kësaj veprimtarie që mund të çojë deri në vendosjen e një bombe poshtë makinës.

Po ashtu, një pistë tjetër është dhe ajo e ndonjë gjobe të papaguar. Mësohet se babai i saj është biznesmen dhe policia dyshon se ndonjë prej grupeve kriminale të Shkodrës t’i ketë vënë gjobë të atit të saj dhe pasi ai nuk e ka paguar, ta kenë paralajmëruar përmes së bijës.