Është arrestuar pas katër muajsh Mitri Prifti i cili më 29 maj të këtij viti tentoi të vrasë me armë zjarri Edison Begajn, ngjarje e ndodhur në fshatin Kaninë të Vlorë.
Shkak i atentatit dyshohet se u bë një përplasje që kishin pasur Begaj dhe Prifti me njëri tjetrin në zonën e Lungomares në Vlorë. Të dy Begaj dhe Prifti janë grindur në një lokal në Lungomare dhe Begaj e ka qëlluar me shpullë Priftin. Kaq ka mjaftuar që ky i fundit të ndërmarrë atentatin.
Vetëm disa ditë më vonë, Pritfi ka shkuar pranë banesës së Begajt, ku të pranishëm ishin edhe fëmijët e tij, ndërsa autori ishte i veshur si polic. 41-vjeçari mori 4 plumba në gjymtyrët e poshtme të trupit, por mundi të shpëtojë.
Prifti u largua nga Shqipëria 3 ditë pas ngjarjes, ndërsa nga verifikimet e kryera ka rezultuar se është larguar nga Porti i Durrësit në datën 1 qershor të këtij viti. Ai është larguar me traget në drejtim të Italisë, ku vetëm ditën e sotme është bërë i mundur arrestimi i tij.
Në lidhje me ngjarjen Gjykata e Shkallës së Parë në Vlorë i ka caktuar masën e sigurisë “Arrest me burg” për veprat penale “Vrasja me paramendim”, e mbetur në tentativë dhe “Armëmbajtja pa leje”.
