Gjashtë persona janë shoqëruar në policinë e Vaut të Dejës për tu marrë në pyetje në lidhje me atentatin ndaj Bernard Ndrecës, kreu i Partisë Demokratike në Vaun e Dejës.
Një ditë pas ngjarjes, ekspertiza ka dalë në përfundimin se në atentat është përdorur 50 gramë eksploziv që ishte vendosur në pjesën e parme të mjetit të Ndrecës.
Grupi hetimor ka sekuestruar të gjithë kamerat e sigurisë në zonë në mënyrë që përmes pamjeve të bjerë në gjurmët e dy personave që kanë organizuar këtë atentat.
Dyshimet e forta janë që Ndreca të jetë mbajtur nën monitorim dhe që lënda eksplozive të jetë shpërthyer me telekomandë, në momentin që autorët kanë parë se ai është futur në mjet dhe e ka ndezur atë.
Ngjarja ndodhi mëngjesin e një dite më parë. Ndreca nuk u plagos pasi eksplozivi kishte rënë në tokë para të shpërthente. Në të kundërt, pasojat mbi kreun e PD-së do të kishin qenë mjaft të rënda. Kjo ngjarje solli reagime të mëdha nga ana e politikës.
Kryedemokrati Sali Berisha dhe kreu i Partisë së Lirisë Ilir Meta kanë fajësuar qeverinë për këtë sulm dhe e kanë konsideruar politik, duke qenë se ndodhi prag zgjedhjeve lokale. Maxhoranca, përmes ministres Elisa Spiroapli ka hedhur poshtë këto akuza dhe ka kërkuar që ngjarja të zbardhet.
Discussion about this post