Hapja e celularit të 37-vjeçarit Iljaz Çali, i cili u ekzekutua mbrëmjen e 4 prillit teksa ishte duke udhëtuar në autostradën Tiranë-Durrës ka drejtuar policinë drejt një piste të re hetimi, duke zbehur dyshimet se ai mund të jetë vrarë për konfliktet për kromin.
Nga zbërthimi i celularit, policia ka zbuluar se kohët e fundit 37-vjeçari kishte komunikuar me 2 persona me precedent të theksuar kriminalë.
Nga hetimet rezulton se 37-vjeçari Iljaz Çali komunikonte shpesh me një person të dënuar për grabitje me armë dhe një tjetër të dënuar për krime ndaj personit dhe linte takime me secilin prej tyre. Në lidhje me këto takime, policia e Tiranës ka marrë në pyetje familjarë të viktimës të cilët nuk kanë pasur asnjë dijeni për këto njohje.
Familjarët kanë thënë se nuk kanë asnjë të dhënë për këto takime dhe i qendrojnë faktit se konfliktet e vetme të 37-vjeçarit lidheshin me aktivitetin e kromit, por nga verifikimet policia nuk ka gjetur asnjë të dhënë që ta përforcojë këtë pistë.
Grupi hetimor tani po përqendrohet te pista e re e hetimit pasi dyshon se 37-vjeçari mund të jetë vrarë si pasojë e përplasjes së 2 grupeve rivale mes te cilëve Çali ishte ndërmjetësi. Qelizat telefonike dhe kamerat e bizneseve ku janë bërë takimet pritet ti japin dritë jeshile hetimeve.
Discussion about this post