Detaje të tjera kanë dalë në dritë nga hetimet e atentatit të ditës së djeshme në “Don Bosko”, ku mbeti i vrarë 25-vjeçari Erion Çela, dhe mbetën të plagosur katër persona të tjerë. Lidhur me ngjarjen është marrë dëshmia e menaxherit të lokalit, Daniel Lila, i cili ka thënë se viktima pak momente para atentatit, ka konsumuar një kafe me bashkëshorten e tij. Disa momente më vonë ai është ulur në po të njëjtin lokal me disa persona të tjerë.
“Unë kam qenë te lokali te lokali brenda, ka ardhur një makinë tip C-Class dhe kanë gjuajtur në drejtim të lokalit, në drejtim të tavolinës ku kanë qenë ulur personat dhe aty kanë qenë 4-5 persona. Më parë kanë qenë gratë e tyre, rreth 5 minuta më vonë kanë ikur gratë dhe kanë ardhur disa persona të tjerë që kanë gjuajtur në drejtim të atyre. Për pjesën e lokalit, nga stafi nuk është dëmtuar asnjë siç flitet që një 19-vjeçar është dëmtuar. Nga pjesa e stafit nuk është asnjë i dëmtuar. Erdhi ambulanca, ambulanca ka kaluar rreth 20 minuta, 30 minuta gati që Ushtaraku është afër, ka ardhur pas gjysmë ore gati. Kurse trupi i pajetë ka ngelur atje për gati 1 orë, 1 orë e ca. Në lokal nuk ka ndodhur asnjë problem, edhe neve na ka ardhur papritur. Kanë qenë klientë të përhershëm, kanë këtë tabakinon këtu”, tha ai.
Nga grupi hetimor burime bëjnë me dije se dyshohet që atentati është kryer nga vrasës me pagësë, për shkak se në vendngjarje nuk është gjetur asnjë gëzhojë. Ndërkohë targat e mjetit tip “Benz”, nga i cili autorët kanë qëlluar, rezulton me targa të vjedhura në Vlorë. Gjithashtu dyshohet se autorët kanë ngatërruar objektiv, pasi dyshohet se shënjestër e atentatit mund të ketë qenë daja i viktimës, Edmond Crroj, i cili mësohet se ka pasur probleme me drejtësinë jashtë shtetit.
Discussion about this post