Policia ka arritur të identifikojë një nga viktimat e atentatit që ndodhi pak më parë në Fushë-Krujë. Sipas të dhënave ai është Diklen Vata, 30 vjeç nga qyteti i Laçit. Nuk dihet ende shkaku i këtij atentati, por policia dyshon se kemi të bëjmë me larje hesapesh, pasi Diklen Vata është emër i njohur për policinë. Bëhet me dije se 5 vite më parë ai është kapur duke shpërndarë drogë në Tiranë. Konkretisht, mësohet se me datë 28 shtator 2017 Policia e Tiranës ka arrestuar një shpërndarës drogash të forta në Tiranë. Diklen Vata, 25 vjeç, u arrestua pasi policia i gjeti disa doza kokainë fshehur në çorape dhe në çelësat e makinës.
Gjatë kontrollit fizik të ushtruar ndaj këtij shtetasi tek zona e shkollës “Bajram Curri”, i është gjetur e fshehur në çorape një mbështjellëse me kokainë si dhe 3 mbështjellëse të tjera të fshehura në çelësat e makinës. Asaj kohe Vatës i janë sekuestruar në cilësinë e provës materiale 22 doza me lëndë narkotike e dyshuar e llojit kokainë e cila rezultoi e peshës 11.4 gramë, 3 aparate celularë, mjeti i markës “Rover”.
Nga kjo dyshohet se atentati i sotëm ka të bëjë me prishje pazaresh droge, ndërsa theksojmë se në shënjestër kanë qenë të tre viktimat, por emrat e dy të tjerëve nuk janë zbuluar ende.
Discussion about this post