Një 17-vjeçar është arrestuar lidhur me të shtënat që ndodhen në Kamëz fundjavën e kaluar. Adoleshenti dyshohet se drejtonte automjetin nga i cili u qëllua me armë zjarri në drejtim të automjetit tjetër. Ngjarja u shënua mbrëmjen e së shtunës, rreth orës 22:30, në rrugën “New York” pranë Rrethit të Bathores në Kamëz.
Sipas njoftimit të policisë, 17-vjeçari i nxitur nga shtetasit e tjerë të përfshirë në këtë rast për të pranuar autorsinë e rastit, ka dhënë deklaratë të rreme gjatë veprimeve hetimore.
“Si rezultat i veprimeve intensive hetimore të kryera në drejtimin e Prokurorisë, për zbardhjen e rrethanave të ngjarjes së ndodhur më datë 22.02.2025, në Kamëz, specialistët për Hetimin e Krimeve të Komisariatit të Policisë Kamëz kanë identifikuar, kapur dhe vënë në pranga një shtetas 17 vjeç, banues në Kamëz, për veprat penale “Veprime që pengojnë zbulimin e së vërtetës“, “Deklarata e rreme para oficerit të policisë gjyqësore” dhe “Drejtimi i automjetit në mënyrë të parregullt”, thuhet në njoftimin e policisë.
“Nga hetimet dyshohet se ky shtetas, i nxitur nga shtetasit e tjerë të përfshirë në këtë rast, për të pranuar autorinë e rastit, ka dhënë deklaratë të rreme gjatë veprimeve hetimore. Punohet për kapjen e 3 shtetasve të shpallur në kërkim për këtë rast dhe për dokumentimin e plotë të ngjarjes. Materialet procedurale i kaluan Prokurorisë së Tiranës, për veprime të mëtejshme”, shtuan të njëjtat burime.
Në kërkim nga policia lidhur me ngjarjen janë po ashtu, dy 24-vjeçarët Dejvi Mullai dhe Fabion Kurti, të cilët akuzohen se qëlluan me armë zjarri ndaj Enedjon Kaçit, si edhe vetë shënjestra.
Sipas hetimeve paraprake: Dy autorët e dyshuar, Dejvi Mullai dhe Fabion Kurti, qëlluan me breshëri plumbash nga një makinë tip “BMW X5” në drejtim të mjetit “Land Rover” me të cilin po lëvizte Enedjon Kaçi. Megjithatë, asnjë nga plumbat nuk e preku shënjestrën. Pas atentatit, autorët u larguan me shpejtësi në drejtim të qendrës së Kamzës dhe më pas braktisën automjetin në rrugën “Valeta”, duke u arratisur me një tjetër makinë tip “Golf” të bardhë. Nga ana tjetër, Enedjon Kaçi u largua në drejtim të Kodër Institutit, ku braktisi makinën e tij pranë një karburanti. Hetimet kanë konfirmuar se në krahun e majtë të mjetit të tij kishte dëmtime nga plumbat.
Discussion about this post