Një ngjarje e rëndë ka përfshirë Lushnjën ditën e sotme, ku disa persona të cilët kanë qenë duke udhëtuar me një automjet tip “Golf 5” me ngjyrë të zezë, kanë qëlluar me armë zjarri tip kallashnikov në drejtim të një lokali në pedonalen e qytetit.
Viktima e cila u qëllua sot me kallashnikov, është Bledar Muça, pronari i “Bar Pedonales” dhe babai i dy fëmijëve. Mësohet se krimi i rëndë ka ndodhur rreth orës 22:00, teksa Muça qëndronte në një tavolinë në trotuarin e lokalit të tij, nën shoqërinë e kunatit, të identifikuar si Judin Velo. Mendohet që pronari ka qenë objektivi i kësaj bande që në fillim.
Në momentin e të shtënave në lokal ka pasur shumë njerëz, përfshirë këtu gra dhe fëmijë, të cilët janë shtrirë përtokë për t’u shpëtuar plumbave. Por fatkeqësisht, nga kjo situatë e krijuar, duke e transformuar vendin në një kaos, jo të gjithë arritën të shpëtonin prej fishekëve të lëshuar kundrejt tyre.
Edhe pse nga informatat e para që dolën nga vendngjarje u raportuan për tre të plagosur, në të vërtetë, efektivët zbuluan se në total ishin pesë persona të lënduar.
Policia njofton se bashkë me Judin Velon, Ervis Tafan dhe Sara Liçin, në spital janë dërguar edhe Eksara Sauli dhe Majlinda Gjyla. Deri tani mësohet se Tafa, Velo dhe Liçi ndodhen në terapi intensive ku gjendja e tyre shëndetësore është e rënduar, kurse Sauli e Gjyla, janë jashtë rrezikut për jetën.
Pasi realizoi objektivin dhe shkaktoi një ‘kasaphanë’ në lokal, autori ka hipur sërish në makinë dhe është larguar në drejtim të paditur bashkë me personin që e shoqëronte. Ndërkohë në fshatin Thanasaj është gjetur një automjet i djegur që dyshohet se i përket autorëve.
Për momentin, policia ka ngritur pika kontrolli në hyrje-daljet e qytetit dhe është duke punuar për të parë se çfarë i ka shtyrë autorët që të kryenin këtë akt, e të gjuanin me breshëri plumbash.
