Policia ka dhënë sot më shumë informacione në lidhje me atentatin që ndodhi pak ditë më parë në Milot, ku humbi jetën 28-vjeçari Klinsman Preçi dhe mbeti i plagosur 46-vjeçari Ylli Brahimi. Sipas informacioneve, aktualisht policia po merret me ekzaminimin e pamjeve filmike të sigurisë të cilat kanë regjistruar momente të caktuara gjatë atentatit.
Ndërkohë, theksohet se është me shumë rëndësi dhe dëshmia që do të japë Ylli Brahimi, pasi ende nuk ka mundur që të japi dëshminë e tij para policisë, duke qenë se ndodhet në spital. Shëndeti i 46-vjeçarit është përkeqësuar dhe nuk është në gjendje të dëshmojë. Policia njofton se 46-vjeçari është tentuar të merret në pyetje nga dy oficerë, por për shkak të komplikacioneve, nuk ka qenë në gjendje të dëshmojë. Ndaj dhe dëshmia është lënë të merret në një moment të dytë.
Deri më tani, të gjitha të dhënat tregojnë se Brahimi ishte objektiv i atentatit, ku ai u plagos dhe mbeti i vrarë fqinji dhe shoferi i tij, Klisman Preçi. Ngjarja e rëndë ndodhi në hyrje të pallatit ku banonin Brahimi dhe Preçi. Autorët, që po i ndiqnin prej kohësh, dolën nga mjeti i blinduar dhe më pas e qëlluan me breshëri plumbash, plot 108 të tillë, duke bërë shoshë edhe mjetin anti-plumb. Të dy të rinjtë u dërguan me urgjencë në spital, por 28-vjeçari Preçi ndërroi jetë. Kjo ngjarje dyshohet të ketë lidhje me atentatin e ndodhur në 17 korrik në Fushë-Krujë ku mbetën të vrarë Brilant Martinaj, Dikler Vata, dhe Besmir Hoxha, por nuk ka asnjë fakt që i lidh të dyja atentate, veç të shkuarave të tyre që ndërlidhen.
Discussion about this post