30-vjeçari, Kristian Marku është i riu që mbeti i vrarë nga një breshëri armësh në autostradën Vlorë-Fier, pranë një karburanti në fshatin Novoselë, ndërsa rrethanat e sakta të ngjarjes mbeten ende të paqarta.
Ngjarja sipas informacioneve zyrtare ka ndodhur rreth orës 18:15, ku dyshohet se është qëlluar me armë zjarri në drejtim të një automjeti tip “Volkswagen”, me drejtues shtetasin Kristian Marku, 30 vjeç, i cili ka humbur jetën si pasojë e plumbave.
Në momentin e atentatit ka patur edhe makina të tjera në autostradë, qe janë përpasur me njëra-tjetrën për shkak të frenimit të papritur.
Në vendngjarje kanë shkuar shërbime të Policisë së Vlorës dhe grupe të Forcës Kombëtare të Sigurisë, Njësia Fier, ndërsa vijon krehja e zonës dhe kontrollet për kapjen e autorëve.
Sakaq për zbardhjen e ngjarjes së rëndë që tronditi mbrëmjen e së hënës vendin tonë, është ngritur një grup i posaçëm hetimor. Ndërkohë po punohet për zbardhjen e rrethanave dhe sigurimin e provave, me qëllim dokumentimin ligjor të ngjarjes, identifikimin dhe kapjen e autorit/ve.
Viktima Kristian Marku, rezulton person me precedent penal për “Vrasje me dashje në bashkëpunim, mbetur në tentativë” dhe “Mbajtja pa leje e armëve të zjarrit dhe municionit luftarak”.
Në vitin 2023 Kristian Marku alias Kristi Bardhi është skeduar nga policia si i dyshuar për një ngjarje të ndodhur në 26 mars të këtij viti në Rrëshen, ku pati të shtëna me armë zjarri në drejtim të shtetasit me iniciale S. R.
Më tej, në shtator të vitit 2023, Marku është arrestuar nga policia e Kurbinit pasi është kapur me një armë zjarri tip pistoletë të cilën e mbante pa leje.
Mësohet se Marku është sinjalizuar nga shërbimet e policisë për të ndaluar në afërsi të fshatit Shëmri të Kurbinit, por sapo ka vërejtur autoritetet ai ka hedhur armën e mbushur me fishekë nga dritarja e makinës në të cilën ndodhej.
Discussion about this post