Atentati në Sarandë/ “Isuf Jaçaj e paralajmëroi të birin: Dorëzohu, ndryshe do të të gjej vetë, katër ditë më pas, u vra”

Një shpërthim i fuqishëm tritoli tronditi mbrëmjen e 5 tetorit lagjen nr. 3 të Sarandës, duke i marrë jetën 58-vjeçarit Isuf Jaçaj, një emër i njohur në zonë për aktivitetin e tij në fushën e turizmit. Viktima u vra në mënyrë mafioze, pasi rreth 800 gramë eksploziv ishin vendosur poshtë automjetit të tij, duke shkaktuar vdekjen e menjëhershme në vendngjarje.

Isuf Jaçaj ishte babai i Kalus Jaçajt, 31 vjeç, aktualisht i burgosur për “përkrahje të autorit të krimit” në një ngjarje të mëparshme që lidhet me një konflikt për pronën në bregdet. Pista kryesore e hetimeve është ajo e hakmarrjes së strukturuar, që përfshin plagosjen e dy personave në muajt e fundit dhe një seri ngjarjesh të dhunshme që kanë përshkallëzuar tensionet mes disa familjeve në qytet.

Në lagjen nr. 4 të Sarandës, Ramadan Zoto, i njohur edhe si Ramadan Canaj, 43 vjeç, plagosi me armë zjarri Gëzim Hajdarajn dhe Ernest Lamën nga Kamza. Pas ngjarjes, policia shpalli në kërkim autorin e dyshuar së bashku me vëllain e tij, Erjon Canaj, Artan Muratajn dhe Kalus Jaçajn, për “moskallëzim krimi” dhe “përkrahje të autorit”. Sipas burimeve të News24, Kalus Jaçaj kishte strehuar autorin e plagosjes në shtëpinë e tij për ta mbrojtur nga një hakmarrje e mundshme. Vetëm disa ditë më vonë, Canaj u arrestua në Korçë ndërsa tentonte të kalonte kufirin për në Greqi, me një armë të gatshme për qitje.

Në komunikimet e siguruara nga hetuesit, babai i Kalusit, Isuf Jaçaj, kishte tentuar ta bindte të birin që të dorëzohej në polici. “Duhet të dorëzohesh vetë në polici për përkrahjen e autorit të krimit, në të kundërt do të vij unë të gjej ku je fshehur dhe të dorëzoj me duart e mia”, i kishte thënë ai në një telefonatë.

Por vetëm katër ditë pas ndihmës që i dha autorit të plagosjes, më 22 korrik, makina e Kalus Jaçajt u hodh në erë me tritol. Në mesazhet kërcënuese që i ishin dërguar, shkruhej: “Dorëzo Ramadan Canaj, autorin e plagosjes, në të kundërt do të vrasim ty dhe familjarët e tu.”

Ngjarja e mbrëmjes së 5 tetorit duket se është akti kulmor i një hakmarrjeje të përgjakshme, ku viktimë ra Isuf Jaçaj. Megjithëse kishte precedentë penalë, ai njihej në komunitetin e Sarandës për punën e tij në sektorin turistik dhe përpjekjet për të qëndruar larg përplasjeve të të birit.

Policia po vijon hetimet për të zbuluar autorët e vërtetë të shpërthimit dhe për të çmontuar rrjetin e përfshirë në këtë seri ngjarjesh që po e kthejnë Sarandën në një skenë përplasjesh mafioze me motive pronësie.