Detaje dhe dëshmi të reja janë zbardhur nga atentati me armë zjarri që ndodhi sot në Shijak, ku një i ri i shpëtoi për mrekulli plumbave. Banorët që kanë qenë aty pranë momentin kur ndodhi ngjarja kanë rrëfyer detaje nga momenti për mediat. Një nga banorët tregon se nuk ka dalë nga shtëpia direkt pas të shtënës së parë, por pasi dëgjoi që plumbat vijonin. Sipas banorit, kamionçina që drejtonte ish-efektivi Orland Paplekaj i ka rënë shtyllës pasi ka humbur orientimin. Të trembur, vetë banorët kanë lajmëruar policinë.
“Dëgjova tre krisma. Dëgjuam të parën nuk dolëm, dëgjuam të dytën dolëm jashtë, ishim duke pirë kafe te lokali dhe pamë që kamionçina i ra shtyllës, bëri masë korenti. Kur dolëm, vetura që e qëlloi iku. Ne s’pamë asgjë se një moment ishte. Lajmëruam policinë”, thotë ai.
Më tutje tregoi se kur iu afruan makinës panë që Paplekaj ishte zverdhur dhe gati në gjendje të fikëti. Në të moment ata i kanë dhënë ujë për ta qetësuar dhe kanë parë plumbin aty pranë automjetit. Por, shprehet se askush nuk ka mundur të shoh autorin. ““Shoferi ishte tmerruar, ishte zverdhur. Morëm ca ujë ia dhamë edhe pritëm sa erdhi policia. Nuk e pamë makinën që qëlloi, jo , absolutisht jo. Pamë vetëm plumbin poshtë aty. Këtej del direkt për autostradë pastaj, ikën për Tiranë”, shprehet një banor.
Discussion about this post