Atentati në Shkodër, kush është Pashko Ujka?

Pashko Ujka, i cili u plagos mbrëmjen e sotme në qytetin e Shkodrës, është i njohur për qytetarët e Shkodrës, pasi ka mbajtur disa poste publike.

Në vitet 2005-2009, Ujka ka shërbyer si deputet. Ujka shkoi nga Partia Aleanca Demokratike te Partia Demokristiane e Nard Ndokës ku mbajti për disa kohë postin e kreut të grupit parlamentar. Në vitin 2009 ai u shkarkua nga Nard Ndoka lidhur me mënyrën e votimit dhe pas përçarjes së partisë.

Në vitet 2011-2015, ai ka drejtuar komunën e Velipojës për një mandat nën siglën e Partisë Socialiste, ndërkohë që ka qenë dhe në krye të ekipit sportiv Ada.

Ndaj Ujkës ka pasur edhe shumë denoncime si dhe ka qenë në shënjestër e atentateve dhe dy herë të tjera.

Mësohet se ai është plagosur edhe një herë tjetër gjatë periudhës kur shërbente si kryekomunar për periudhën 2011-2015. Ndërkohë një herë tjetër, persona të paidentifikuar kanë qëlluar edhe ndaj banesës së tij pa të lënduar, por edhe kjo ngjarje nuk është zbardhur nga autoritetet.

Por sot duket se “armiqtë” e tij kanë vendosur që të godasin sërish, duke e plagosur në shpinë ish-deputetin e Partisë Demokristiane.